السودانيات بقن شينات

الدكتور الفلكي انور احمد عثمان.. الشهير بي دكتور عثمان .. فلكي سوداني لية 45 سنه في المجال ده … ود الشماليه …وامدرمان كمان…واتخرج من جامعه الخرطوم كليه الاداب والفلسفه … يعني منظراتي كبير… وعمل دبلوم صحافه ماعارف وين.. وماجستير في الزعيم الازهري … عن الاقمار الصناعيه .. ودكتوراه في تكنولوجيا التعليم.. يعني الزبده كمل العلم كلو .. ماخل حاجه. واشتغل في السعوديه وقطر والبحرين .. المهم.. راجل سوداني عادي .. بسمع المزك السوداني زي اي حاج او راجل كبير. ناس الكاشف وعثمان حسين والخ. .. حلم حياتو انو يمشي المريخ . وفعلا نوعيه الزوول ده لازم يمشوا يعيشوا في المريخ لانو ما ممكن يعيش معانا نحن اليشر بالتفكير حقو ده مع فائق الاحترام والتقدير.

الحصل كالاتي

استضافت قناة النيل الازرق السودانيه الاصيله.. وانا ماعارف ليه ما قطعوا المشهد ده .. عدة اشخاص في برنامج تلفزيوني بيكلم عن مواضيع عامه عاديه ومن الضيوف كان سعادة الدكتور … يلا صدف كان فتحوا في اللقاء واتكلموا عن المرأه السودانيه المعاصره وجاء دور الدكتور في الكلام وقام قال

خليني اكتب ليكم الكلام عديل عشان احتمال تكونو ما سمعتوا كويس


http://www.youtube.com/watch?v=ox-ag8XT56w

بالنسبه للمرأه السودانيه انا افتكر انا غبت كتير عن السودان .. قد يكون ربع قرن.. بعدين انا جيت هنا هسع.. جيت اندهشت جدا

اول حاجه نسبة الجمال قلت جدا يعني اغلبم شينات خالص خالص بعدين الشينات ما بريحوا الانسان

يعني انا بزات بتعمل لي حمى بتعب جدا .. فا اغلبم شينات .. ما زي زمنا نحنا الكانوا في الجامعه كتبوا فيهم قصيدات والكانوا بكتبوا فيهم الاشعار

هسع ما بتلقى وحده منهم بكتبوا فيها شعر ولا بكتبوا فيها قصيده مافي..

بعدين ده زاتو في الاختيار مشكله يعني الرجل ممكن يختار مثلا بت بعدين تظهر ليو على صورتها الحقيقيه بعد الزواج يعني فااا القبح ده زاتو ما بخلي الاستقرار ….. يعني ما بخلي الحياه تكون جميله بي صووره عاامه .. انا بعد جيت اندهشت جدا والله .. اندهشت خاالص خاالص… ما زي الصوره الزمان الكان بكتبوا فيها شعراء وادباء.. زمنا يعني  في زمن الجامعه ولا كده ..

على كل حال نمش للموضوع الاساسي ..

حتى بنات الجامعه كان الزوول بعاين ليهم يرجف زاتو من جمالم ومن شعورم وكده وما بسوا الكريمات والمصايب دي والحاجات دي . لكن اسه مافي …


ده كان كلام الدكتور عثمان.. طيب يا دكتور.. ابدا ليك من وين ؟

في البدايه شكرا ليك في الابداء بي رأيك .. من واجبي كمخالف لرأيك ان احترم رأيك وارد عليك بأحترام

اولا : ياخ ما صح عليك انك تقول المرأه السودانيه بقت شينه في تلفزيون فضائي وكل العالم ده بحضر فيك .. ياخ الناس الما سودانيين دايرهم يقولو شنو عننا لمن يسمعوا الكلام ده .. انت لو بتحب وطنك فعلا ما كان قلت كلام زي ده في قناه فضائيه

تاني حاجه: بعدين لو الانسان شين .. ماصح اني امشي ليو واقول ليو ياخ انت شين.. لاني كده هجرح مشاعرو وانت لو عندك مشاعر ما كان قلت كلام زي ده ..

تالت حاجه: انت على اي اساس جمعته وقلت السودانيات بقن كلهن شينات ؟ انت شفت كل بنات ونسوان السودان عشان تقول كده ؟ ولا بس عشان شفت ليك 10 ولا 20 امرأه داير تجي تقول وتجمع ؟

رابع حاجه: تخيل اجي انا واقول ليك اني لمن اشوفك بتجيني حمى وبرجف والكلام القلته ده .. احساسك هيكون كيف ؟

خامس حاجه : ما تخلط وتقارن زمنكم بي زمنا . زمنكم كان الناس بكتبوا اشعار كوسيله تعبير عن حبه وتعليقه بالفتاه.. زمنا احنا مختلف عنكم . فما عشان احنا ما بنكتب قصيده في البنات البنحبهم معناتا انو البنات شينات وماف زوول معجب فيهم

سادس حاجه: الزواج قسمه ونصيب . فاا لو ما حصل توافق في الزواج .. ما ممكن يكون السبب انو البت طلعت شينه لانو ده سبب عوير خلاص .. والزواج ما سااي كده . اكيد طبعا قبل الزواج العرسان لازم يكونو بعرفوا بعض واتكلموا مع بعض ووجدوا نفسهم متوافقين مع بعض . الا اذا كان قصدك الزواج التقليدي الي هو زاتة خطأ كبير انك تتزوج وحده وانت ما عارف عنها اي حاجه .. فما تدمج الاتنين في بعض

سابع نقطه ليك: تأكيدك  الشديد انو الحكايه دي بضايقك شديد دي صراحه قلة ادب منك .. دي نظام ياخوانا  يا بنات شوفو ليكم حل .. اتخارجو من العالم ده ما داير اشوف بت سودانيه في البلد دي

فراجع نفسك يا دكتور في كلامك الغلط ده وكفايه احراجات وفضايح لبلدك

وما تجمع لو شفت ليك بت او بتين شينات .. معناتا البنات كلهم شينات .. غلط

وختاما بهدي تحيه خاصه للاستااذه ساره الحسن لردها الرهيب والخطير  على الكلام ده

http://www.youtube.com/watch?v=lT7KkcWp5Ro

كيف تكون #زول_اعمال #ناجح ؟

ريادة_الاعمال

بالعاميه #السودانيه

كيف تعمل شركتك الخاصه ليك ؟

اعمالنا الخاصه لينا اللي بتفيدنا وبتفيد المجتمع الحولينا

“My interest in life comes from setting myself huge, apparently unachievable challenges and trying to rise above them.”

يظهر اهتمامي في الحياة من خلال جعل نفسي عظيما ، جعلها تحديات مختلفة غير ممكن الوصول لها و المحاولة للتغلب عليها

رتشارد برانسون- مؤسس مجموعة شركات فيرجن

“Be a yardstick of quality. Some people aren’t used to an environment where excellence is expected.”

كن على قدر عال من الجودة ، بعض الناس غير معتادين على بيئة يكون فيها التفوق متوقعاً

ستيف جوبز- مؤسس شركة ابل

“Success is a lousy teacher. It seduces smart people into thinking they can’t lose.”

النجاح معلم حقير ، أنه يغري الأشخاص الأذكياء بالتفكير أنهم لن يفشلوا

بيل جايتس- مؤسس شركة مايكروسفت

المقدمه

بيل جايتس—ستيف جوبز—مارك زوكربرغ بتاع الفيس … ديل كلهم وغيرهم كمان بقوا حاليلا وسيظلو #اسماء_في_حياتنا نحن الشباب , لانهم بالجد غيروا حياتنا واختصروا المسافات وسَهلو حاجات كتييييره لينا. وخلونا متواصلين وتامين ولاميين . هههههه بالجد .

لكن السؤال والكلام الاهم .. انت .. اي انت .. ما نفسك تبقى زيهم ؟ ما نفسك تبقى رائد اعمال زيهم ؟ او زي ما بقول عنوان الكتاب #زول_اعمال ؟ ما نفسك يوم كده تأسس شركتك الخاصه بيك ؟ بزنزك الخاص فيك ؟ طفلك الرضيع اللي تَكونو شويه وشويه لحدي ما يكبر ويكبر وليه لا بالقروش البتجيك منها تأسس ليك شركه تانيه او خليني اقول تجيب ليك طفل تاني .. وهكزا.

زمان انا اول ما خلصت الثانوي, كان كل همي اني اخش اي كليه اقرا واتخرج واشتغل واعرس وخلال قرايتي في الكليه استمتع بحياتي.

لكن الحمد لله وبفضل الصحبه الصالحه , اكتشفت انو الدنيا دي فيها حااجاات كتييره #الزيت احنا كشباب ما جايبين عنها اي خبر. بس همنا كلو #المزك والحفلات و #الجكس و#الكلام_الفارغ  والخ الخ..

اكتشفت انو في حاجه اسمها #ريادة_الاعمال, الا وهي  انك تعمل او تنشأ او انك تسوي ليك منظمه او شركه جديده ما اتعملت قبل كده. او انك تأسس ليك حاجه (اولريدي) قايمه بس انك تطور فيها وتخليك #شفت وتفكر في انو كيف تصل القمه مع العلم بوجود منافسين ليك . زي #حنك ناس ابل ومايكروسوفت وسامسونج #منافسه_تقيله .

الكلام ده كلو انا عرفتو تقريبا في 2010 وفعلا بديت امشي ورا شغفي وابتدت حياتي تتغير وافكاري تزيد والحكايه دي كمان خلتني اتعرف على ناس كتاار استفدت منهم كتير.

بديت بالمشاركات في مسابقات ريادات الاعمال, كانو بطلبو مننا انو نجيهم بفكره ونكتب ليها (بزنس بلان) اي الخطه العمليه او الخطه التجاريه , واللي بتشرح اولا ما هي فكرتك ومن هم عملائك , ولماذا تعتبر فكرتك فكره #جهنميه , وليه حقو الواحد يستثمر فيها ؟ والخ الخ.

وتشرح كمان .. ما هي خطتك التسويقيه والاداريه والماليه ,, الخ الخ.

المهم , شاركت ووصلت للنهائيات لكن ما فزت. طبعا جاني ليك احباط كده انسى بس, بعد التعب ده كلو قلته #$%& البزنس زاتو , لكن ما استسلمته وواصلته الشغل والحمد لله جاتني افكار تانيه وحاليلا شغال عليهم مع الاصدقاء .

الحنك الاهم انت ما تقيف (زي دعايه سنيكرز) #لا_توقف ههههه.  كمل . انجز هتتعب , لكن هترتاح في النهايه مع سعاده لا توصف.

عاين ديل كانو وين وبقوا وين .. كَشف بتاع الفيس ده كان كيف وبقى كيف.. كان طالب جامعي ساي لكن شغفو في الكومبيوتر.. انجز بجاي وبجاي اسه اغنى شاب في العالم, افاد نفسو وافاد العالم. #شفت  #اصلي_كيف.

المهم .. كفايه #نٍقه ونرجع لموضوع الكتاب زاتو

كيف تكون #زول_اعمال_ناجح ؟ عشان تنجح وتفيد نفسك وتفيد بلدك . صدقني لو انت بس بقيت ناجح ساي , هتلاقي الشعب السوداني براهو بفتخر بيك قدام العالم , انو ده ولدنا تبعنا .

بس ملحوظه قبل ما نمشي قدام: احتمال تكونو لاحظتو اني قاعد بستخدم العاميه السودانيه الشبابيه ومعاها حركه الهاشتاق الخاصه بمواقع التواصل الاجتماعي كتويتر والفايس , ولذلك لجذب انتباه الشباب, لانو انا شاب وواحد من ناس كتار اللي ما بحبو القرايا, عشان كده قلته استخدم الوسائل دي للجذب .

وحاجه تانيه كمان, كلامي ده كلو ما معناهو انو بلدنا الحبوب السودان ما فيهو #رواد_اعمال_ناجحين,  بالعكس !.. انا كان عديتهم ليكم ما حنخلص من كترتم #ماشاءالله

لكن البحر ما بيابى الزياده وخصوصا مننا احنا الشباب , لانو الشباب هم قائدي الغد والمستقبل وهم الاقليه في ريادة الاعمال بالسودان .

وبرضوا كمان حابب اقول حاجه مهمه جدا(سمح العٍلم سمحه الشهاده) ! واللي بعض الناس ما بدوها اهتمام, الا وهو #التعليم . ناس كميه بيقولو : ياخ شوف هنده #بيل_جايتس و #مارك_زوكربرغ  نجحوا بدون ما يكملو تعليمهم اي خلو الجامعه وهم كانو في سنه تالته او رابعه تقريبا . طبعا الدفعه مختلفه .

  لكن العلم هو السلاح والعلم هو النور , ورسولنا الكريم وصانا عليو , قال صلى الله عليه وسلم : اطلبو العلم من المهد الي اللحد .

تخيل معاي بس بيل جايتس بتاع مايكروسوفت بعد ما خلى الجامعه عشان شركتو, وقامت شركتو فشلت ! كان عمل شنو وهو ما عندو شهاده؟ . علي الطلاق الا #يزغرت ايووي يووي هههههههه… طيب #ياخوانا بعد كده نبدا نتكلم في انو كيف تكون #زول_اعمال #ناجح ؟ .

القسم الاول: خلاصة فكرتك

ده هنا اول قسم في التخطيط الصحيح والامثل في تنظيم فكرتك وتأسيسها بالشكل الصحيح.

#الخلاصه شنو ؟ #الزبده ؟ #الزيت شنو منها ؟ حاول تقريبا في نص صفحه كتابتاٌ انك تشرح فكرتك هي شنو ؟ وليه ناجحه ؟  وليه الناس يستثمروا فيها ؟ ؟

عشان كده سموها خلاصه , لانو زي ما قلته ليك قبيل في المقدمه انو في ناس كتار ما بحبوا يقروا , والعبد لله واحد منهم, جني وجن القرايا, بخسرك عديييل كان جيتني وقلت لي هاك اقرا , ههههه.

دايرك تعرف كمان انو نسبه عاليه جدا من المستثمرين ما بحبوا يقروا عشان كده مرحله الاقناع صعبه , حاول انو يكون عندك #حنك_سنين في الخلاصه دي, حاول انت تجزب انتباهم بأي شكل من الاشكال, وما تنسى انو الخلاصه هي اهم جزء في الخطه التجاريه او العمليه , واول جزء , لانو انت محتاج المستثمر لكي يستثمر في فكرتك دي , عشان كده لازم تزبط الخلاصه.

على فكره ! #ريادة_الاعمال  ما الا تكون عمل مربح , ممكن كمان تكون عمل خيري او تطوعي لبناء مجتمع سليم او لمساعدة المحتاجين او حتى لتطوير الاشخاص , ساي بدون مقابل. وانا من هنا بهدي التحيه للاخت (مها فياض) لانها كانت واحد من الاسباب التي انارت عيوني للعمل التطوعي وريادة الاعمال.

ما عايزك تجي وتقول لي ما عندي فكره . ! #اوعك ! حقول ليك #حنكك_بيش_للديش . مافي زول ما نفسو في حاجه او ما عندو حاجه داير يعمله , ان شاء الله كان دكان حتى .

وبرضو ما عايزك تجي وتقول لي : لكن يا عمرابي ياخ الدوله ما مساعداني و#البيبان مقفله كلها وما لاقي لي فرص !

حقول ليك كلامك صح لكن برضو يا صاحبي حنكك بيش .

مره اصحابي(امين اسحاق والمعز الشيخ) قالو لي هاك كَشف الفيديو ده , كان لي واحد صاحبهم بتكلم في #تيداكس_الخرطوم , اسمو ابراهيم مرسال , وانا من هنا بهدي ليو التحيه ,, المهم قال في الفيديو حقو جمله بتتكون من كلمتين فقط , الهموني جداً , وكانو عنوان خطابه و الكلمتين كانو : (اخلق فرصتك).

يعني ما تستنى الفرصه لحدي ما تجيك , يمكن ما تجيك عدييل , وكمان مع الظروف البتمر بيها بلدنا دي #الله_معاك_شديد , عشان كده اخلق انت فرصتك , اعمله بنفسك , ابنيها بنفسك , احتمال الحكايه هطول معاك , لكن حتنجز ! عاين (انور دفع الله) . عمل برنامج تيداكس في السودان . هل هو مليونير ؟ لا هل هو ماسك حاجه في البلد ؟ برضو لا, لكن اجتهد  وخلق فرصتو.

نرجع لموضوع الخلاصه: الخلاصه ممكن تكون كمثال : داير تعمل ليك موقع الكتروني فيو كل الاحداث والبرامج #الزيت الفي السودان عشان الناس يسمعو بيها ويمشو. دي كانت احدى افكاري انا والشباب اصدقائي(امين الطيب- عبدالله علي-محمد داوود) في 2011, وانا هسه هقوم همحورا عشان تتناسق للسودان, لانو فكرتنا لم تكن للسودان .

(شركة انترتايمنت تقدم خطة عمل من شأنها ان تكون ميزه كبيره بالنسبه لجمهورية السودان وخصوصا للشباب السوداني الذين تتراوح اعمارهم ما بين 17و 35, وكذلك السياح الذين يأتون الى السودان. رؤيتنا هي جعل الشباب سعيدين ويلهون ويتمتعون بوقتهم واقامتهم في السودان. ووفقا لاستبيان تم تقديمه للجمهور السوداني حول عطلة نهاية الاسبوع, اين يذهب الناس؟ وماذا يفعلون؟ وجدنا ان الكثير من الشباب لايعرفون الى اين يذهبون, وماذا يفعلون. وان معظم الشباب يذهبون الى نفس الامكان اسبوعياً, كشارع النيل مثلاً. وبالتالي فقط وصلنا الى هذه الفكره. بيان فكرتنا , في ان تكون شركتنا موقع الكتروني على الشبكه العنكبوتيه الرائده. عملائنا سوف يتكونو من الشباب داخل السودان وخارجه ايضا.).

ده_الزيت#

ده كان مثال عن كتابة خلاصة فكره , اتمنى انو يكون عجبكم , واتمنى ايضاَ انو كل #زول يجيب ورقه وقلم ويكتب خلاصة فكرتو فيها .

:اهم شي في #ريادة_الاعمال انو

 فكرتك يا صاحبي تكون منطقيه وواقعيه وبالامكان تنفيذها

  تعرف انك هتركز على منو , الجمهور بتاعك

التسعيره بتاعت المنتج او الخدمه بتاعك تكون مناسبه

 مكان اقامة شركتك مهم جدا

 حاول قدر الامكان شوف ليك ناس يساعدوك في #الحنك ده , اعمل ليك #تيم , وما تنسى انو : ايد مع ايد بتجدع بعيد. #مثل_سوداني .

 خلي عندك المقدره #سُك_الحاجه , اتزكر زمان لمن كنا اطفال بنلعب سك سك ؟ ههههه بس دي نفس القصه هنا , اجري ورا حلمك لحدي ما تقبضوا

 حتفشل ! لكن حاول تاني وتالت …

 اعمل ابحاث استفيد منها, وامشي قابل ناس اتكلم معاهم

 دااايماً خلي في يدك دفتر وقلم , اي كلام يجي في راسك اكتبو طواالي , ما تتردد , ما تقول هتزكروا لأنك ما هتتزكروا لو ماكتبتو في ورقه.

 ما تفكر في راس المال في البدايه لفكرتك , لانك كده ما هتنجز حاجه . بالعكس هتقعد تقول : ياخ انا اسه اجيب القروش دي من وين؟ , لكن لو اشتغلت وعملته خططتك , هتقول انا ما هستسلم , انا انجزت الخطه وتعبت فيها واسه همشي ادور لي على مستثمر يستثمر في فكرتي دي .وهكذا

 الشركه تكون قانونيه طبعا .َ

حاول انك تجيب ليك فكره #الزيت , يكونو الناس بالجد محتاجين ليها .

شوفهم محتاجين لي شنو وحاول وفروا , بطريقه او بأخرى.

كم عدد ناسك ؟ عملائك ؟ اعرف العدد #حاول , عشان تقدر تحسب بعدين الكاش والمصاريف والخ.

اقضي وقت طوييييل في السوق, اعرف منافسينك هم منو و#حنكم شنو ؟ وكيف ممكن تتغلب عليهم ؟

اقنع نفسك في الاول انو فكرتك دي تمام, حتن بعد كده اقنع الناس. الشغف والاهتمام من طرفك لفكرتك واجب ولازم.

القسم التاني :وصف الفكره

هنا يلا تاخد راحتك في وصف فكرتك كتابياَ زي ما انت داير, القسم الفات قلنا خلاصه, اسه هنا الوصف, يعني توصف بمزاج.

ده مثال مشابه لخطة عمل عملناها انا وصديقي (محمد عادل) سنة 2013 , والان انا همحورا عشان تكون متناسقه في الجو السوداني .

(تبلورت فكرة سودان براند سنة 2013 وهي قد جائت لحاجة اصحاب العمل لحلول تسويقيه جديده الكترونياَ , وحاجة الجمهور لدليل شامل عن الشركات المحليه ومتابعة اخر عروضها ومنتجاتها وانشطتها. تهدف الشركه لتحقيق ارباح بنسبة 30% واستقطاب اكثر من 2500 شركه مسجله بالموقع الالكتروني , وحوالي 200,000 متابع من الجمهور المحلي وذلك على الاقل في حلول السنه الثانيه) والخ الخ.

اتزكر! انو انت مفروض تجذب الناس وخصوصا المستثمرين والعملاء.

ركز كمان على استخدام المواقع الاجتماعيه واتعلم كيف تستخدمها بالشكل الصحيح . او الانترنت عامتاَ , من ناحية التسويق المدفوع , محركات البحث, المواقع الالكترونيه , خدمات الايميل و ال اس ام اس .

:خمسه خطوات او مراحل لريادة الاعمال

ابتكر صمم – سًوق مًول ابدأ مشروعك.

القسم التالت: الخطه الخدميه او الانتاجيه

هنا يلا بتشرح انت بتقدم شنو ؟ منتج ام خدمه ؟  وكيف. ؟ وليه ؟ والاستفاده شنو ؟ الخ…

اهم شي في القسم ده , هو #الابداع !

ماهو الابداع ؟ ماهي اجزاء الابداع؟ كيفية تطوير النموذج التجاري , فهم المنهجيه .

اولاً: ما هو الابداع ؟

الابداع هو #حل_المشاكل , هو ايجاد طرق جديده ومشاركتها مع الغير (يعني تعمل ليها شير , ههههههه). الابداع هو معالجة حاجه , او خلق حاجه جديده, حاجه الناس يستخدموها ويستفيدو منها , زي السوشل ميديا #فايسبوك #تويتر , او مثلا في الموضه . واهم شي بعد ده كلو , هو التنفيذ.

اسأل نفسك,,, ما هو الابداع في فكرتي ؟ ليه الابداع مهم في فكرتي دي ؟ متين انا مفروض ابدع في فكرتي دي ؟ ووين ؟

ما هو مبدأ فكرتك العمليه ؟

ده كلو جوابهم واحد بس : الا وهو لفهم الاتساق .. يعني شنو ؟ اديك مثال… كوداك.. تتزكرو شركة كوداك بتاعت الكاميرات دييك القديمه ؟  كوداك فشلت بسبب انو هم ما شافو الاتجاهات المستقبليه اللي شافوها ناس سامسونج وسوني وكانون , #التقنيات #المستقبل , الحكايه كلها عن الابداع الانتاجي .

#الاحتكار ! كيف تحتكر السوق؟ .. ناس #بيبسي , ناس #شٍفووت جدا في التسويق وعشان كده محتكرين

ناس #شيبسي في مصر #معلمين.. عملو حركه سمحه خلاص .. الا وهي انك ترسل ليهم رساله نصيه فيها نكهتك المفضله البتحبها , ولذلك لكي يكونو متواصلين مع جمهورهم ولكي يبنو حلقة وصل.

نجي للخدمات التكميليه #تدفق_الايرادات , اعمل استبيان للجمهور وشوف نسبة اعجاب الفكره كم في الميه ؟ ازا اكتر من 70% يبقى #انطلق . ده معناتو فكرتك دي عندها امكانيه عاليه جدا انو تكبر . قول لنفسك : انا ماشي أأسس عملي الخاص , احسن من اني اكون موظف عادي.

ماهي الاحتياجات ؟

التواصل .. خليك زوول اجتماعي متواصل دايماً

خليك زوول تمام , طيب , سريع الفهم #شفت , قوي الشخصيه, دافع عن فكرتك لانو صدقني هتلاقي ناس كميه حيحاولو يهجمو عليك #ناس_سلبيين

استمتع وتمتع بشغلك ده

استفيد من اي حاجه ممكن تفيدك لصالح مشروعك وخصوصا الانترنت

حاول انك تدي العميل خاصية التخصيص , زي مثلا لمن تمشي ماكدونالدز وتقول ليهو داير شيز برغر بدون خس.

اعمل (ابدايت) دايما , يعني حًدث من اعمالك لكي لا يأتي منافسك ويضربك في السوق.

حاول اعمل (كومبيناشن) يعني ادمج حاجه مع حاجه تانيه #ابداع  #خدمه_جديده او منتج جديد

القسم الرابع: الخطه التسويقيه

هنا يلا بتشرح للناس كيف هتسوق للمنتج او الخدمه بتعتك او للمشروع عامتاً .

كمثال : (سوف تعمل شركة سودان انترتايمنت على اجراء سلسله من استراتيجيات التسويق قبل ان تعلن انطلاقتها الرسميه , وذلك للحفاظ على وضوح الرؤيه والوعي على مدار السنه, وسوف يتحقق ذلك من خلال الانشطه التاليه:

التنبيهات من خلال وسائل الاعلام – مراكز الصحافه والاذاعه المحليه قبل تاريخ الانطلاق

تصميم المواد المهنيه والكتيبات

اعطاء العملاء ملابس واكواب وغيره, عليها شعارنا

 عمل فعاليات خاصه بنا وعمل اعلانات خاصه بنا بعد ان نرى ان الشركه تحرز تقدم

ارسال رسائل قصيره على الهواتف المحموله والايميل والاعلان على الشبكات الاجتماعيه

بالاضافه الى ان الكلمه الايجابيه من افواه العملاء هي اقوى اداه تسويقيه)

القطاعات .. هل مشروعك هو من شركه الى شركه ؟ ام من شركه الى عميل ؟…. يعني هل تستهدف الشركات الاخرى ام تستهدف العملاء . ام تستهدف الاثنين معاً ؟

من شركه الى شركه عليك بالاهتمام الى النقاط التاليه :

المكسب  حجم الشركه نوعيه الشركه المكان خاصه ام حكومه ؟ محليه ام دوليه ؟ متصله على الانترنت ام غير متصله على الانترنت ؟

ومن شركتك الى العميل , عليك بالاهتام بالنقاط التاليه:

 عمر العميل الجنس  الحاله الاجتماعيه  الحاله الاقتصاديه  ستايل الحياه  التعليم  الديانه  المكان  المهنه.

ملحوظه: قبل ما تعمل اي حاجه , اتأكد ازا الحاجه دي اتعملت قبل كده ولا لا. خلي عندك خطة هروب  عشان تحمي نفسك من الاضرار.

حاول بقدر الامكان انو #التسعيره بتاعت الخدمه البتقدمه او المنتج البتقدمو يكون سعر منطقي ومطابق مع احوال الناس في البلد.

!ركز على ناسك

الخدمات التكميليه بتنقسم لقسمين: خدمات تكميليه اساسيه, وخدمات تكميليه غير اساسيه.

الخدمات التكميليه الغير اساسيه زي الاكسسوارات للتلفون مثلاً. دي غير اساسيه لانو التلفون بقدر يعيش بدونا , التلفون بقدر يعيش بدون ما تجيب ليو سماعة اذن بلوتوث مثلاً.

والخدمات الاساسيه زي اسبيرات العربيه , لازم, لانو لو العربيه حصل ليها اي حاجه , لازم تمش تشتري قطع الغيار ليها .

حنك الخدمات التكميليه ده حنك عشان تطلع منو قروش زياده باللفه كده .

القسم الخامس: الخطه العمليه والتطويريه

هنا يلا قسم الشغل وبعديه قسم تطوير الشغل في الخطه العمليه , يعني ممكن كلامك عن خططتك يكون كالمثال ده اللي عن ويب سايت تجاري واللي هي كانت احدى افكارنا انا وصديقي محمد عادل

(بالنسبة لخطة العمل، سيكون مقر العمل في احد منازل اصحاب المشروع وذلك خلال السنتين الاوائل، وسيكون فريق عمل من 4 مختصين لبناء الموقع الالكتروني بعد الانتهاء من تجهيز الموقع سيكلف مطورين الموقع لادارة وتطوير الموقع بشكل مستمر خلال جميع سنوات المشروع, وسزيد عددهم مع زيادة حجم الطلبات, هذا بالنسبة للجانب التقني اما الجوانب الادارية والتسويقية والمالية ستدار من قبل اصحاب الفكرة نسبة لخبرتهم الكبيرة وفهمهم العميق لمضمون الفكرة وكيفية انجاحها.

 بالنسبة لخطة التطوير سيكون التطوير مستمر من بداية العمل بالموقع الالكتروني وذلك نسبة لان الخدمة مرتكزة بشكل رئيسي على توفير خدمات تصميم وبرمجة فلابد من التحديث المستمر لاضافة قوالب وانظمة وتقنيات حديثة وجديدة، وفي خلال السنة الثالثة سيتم الانتقال الى مبنى مؤجر يمثل “المكتب الرئيسي للموقع “وسيتم بناء سيرفرات خاصة, وزيادة عدد العاملين التقنين بالمشروع بما يناسب حجم المشروع. ).

هنا يلا قسم #الشفَنه .. يعني كيف تبقى #شٍفت و …

 تكسب الوقت وتستفيد منو

 توفر قروشك

 تاخد افكار مجانيه من الناس …. تستفيد منهم معلومات .. مثلا عن التصاميم, عن التسويق الخ.

 كيف تتشجع وتشجع المعاك #تيمك فريقك

 كيف توفر جهدك لكن في نفس الوقت تنجز

……………

لازم تطور من نفسك عشان العميل ما يزهج منك , لازم تعمل #ابدايت , حَدث من نفسك ومن شغلك, احبس العميل ! كيف ؟!

كيف تحبس العميل ؟ بأنك ما تخليه يزهج منك , دايماَ اديه كل ما هو جديد ومفيد لكي يستفيد ويظل معاك ومايمشي للمنافس بتاعك .

خلي الحكايه تبقى صعبه على فراقك… خلي فراقك حاار .. زي المنافسه ما بين ابل وسامسونج.. الاتنين دايما بطَلعو حاجات جديده, دايما بعملو ابدايت لأابليكيشناتم(كلمه عويره ههه) #التطبيقات حقتم ,عشان الناس ما يخلوهم ويدوهم #شاكوش والمنافس يعمل ليهك #مقص.. وزي ما قال الفنان (نزار المهندس): الفي ريدو فرَط دقس, بجي غيرو بعمل مقص. هههههه.

ممكن تعمل حركات زي شنو؟ زي مثلا: انت شركة اتصالات,, ممكن تقول للعميل ياخ اسمع : انا حديك ايفون مجاني ! عديييييل كده ! .. بس على شرط, الا وهو انك تكون معانا وبتستخدم شبكتنا على الاقل 3 سنين لي قدام, ولو داير تتخارج مننا قبل التلاته سنين ما يتمو , تدفع رسوم قدرها كده .

كده انت قفلته العميل, او خليني اقول حبستو وختيتو في قفص.

حاصر عميلك , ما تخليو يتخارج منك, الليله وييين قول ليو يا صاحبي , ماف طريقه تتخارج , الله يعزكم قول ليهم دخول الحمام مازي خروجو.

كمثال تاني , ناس اكس بوكس وبلاي استاشن وغيرهم, عشان تلعب لازم تشتري الالعاب حقتم هم بس.

عاين كمان اسه فايسبوك , ما بتقدر تتخارج منو, خلاص ادمًناهو .. بقى ادمان, بقينا ما بنقدر على فراقو, اصحابك كلهم بي هناك والجكس كلوو بهناك وفوق الحله دي الشمار تقييييل برضو بهناك ,, لمن نزًلناه في التلفونات عدييل. يلا شفته كيف ود اليهوديه مارك ده حبس الناس كيف؟ #شفت !

قالو الدود قر قر حبس الدرب #اغنية_الكابلي  #فكر_بها

الواتس اب ,, ادمان #حبس

………………………………………………………..

اسأل نفسك الاسئله دي .

ماهي الميزه التنافسيه في الخدمه اللي انا بقدمها ؟

ماهي المكملات التي انا محتاج اقدمها عشان الزول يدفع اكتر؟

ماذا بأمكاني ان افعل لكي ازيد نسبة التعليم في المنتج بتاعي؟

اساعدك عشان تجاوب…

 فرقك شنو بينك وبين منافسك في السوق؟ #الزيت عندك شنو عشان انا كعميل اجيك و #اجلي الزول التاني ؟

 المكملات بتاعتك شنو ؟ ارجع القسم الفات عن المكملات.. عشان تجيب قروش زياده؟

 انا هنا هديك مثال للمساعده: برنامج سناب شات التطبيقي , اول ما طلع, الناس ما كانو عارفين كيف يستخدمو,, قامو ناس سناب شات استغلو اليوتيوب ونزلو فيديوهات تعليميه لكي تزيد نسبة التعليم والمعرفه للمنتج بتاعم . … حركه حلوه

واتزكر! الناس ما بحبوا يقروا ! الناس دايرين الزيت .. #الزبده الخلاصه .. ما دايرين #نٍقه كتيره. والعكس تماماً .. الناس بحبو يشوفو صور , او فيديوهات , وفيديوهات كمان ما تكون طويله حق #العواره .

حاول انك تخلق ليك شبكه من الناس المحتاج ليهم

اوعك تخت حدود للعميل بتاعك , وفر ليو حاجات كتيره,, واماكن ايضاَ كتيره عشان يشتري المنتج بتاعك, مش تكون انت قاعد في شارع الستين في الخرطوم ويكون عندك عملاء في امدرمان لا قادرين يصلو ليك لا قادر انت تصل ليهم.

استخدم رأي واعمال الجمهور .

كيف ممكن تستفيد من الجمهور؟ كيف تاخد منهم معلومات ؟

زي ناس #ويكيبيديا الناس هم البختو المقالات والابحاث عشان الناس التانيين يستفيدو. وناس الشركه فقط عليهم توفير الويب سايت .

عندك ناس #يوتيوب ! استفادو من الناس , الناس هم البختو فيديوهات عشان الناس التانييين يشوفو,,, وينزلو والخ.

عندك كمان الفايس بوك, تويتر, امازون … الخ

الحشد ممكن يكون في اي حاجه , الناس هم البعملوهو , وانت ماعليك الا فقط توفير المكان.

#التسويق_القابل_للارجاع

كمثال: اشتري كاميرا , ولو لقيت فيها حاجه , حنديك تعويض, او هنرجع ليك قروشك

القسم السادس: المخاطر المحتمله

نجي لي نفس المثال اللي دايما بنستخدمه في بداية كل قسم, الا وهو الموقع الالكتروني التجاري, ومثال على قسم المخاطر المحتمله اللي ممكن تحصل ليك , مخاطر السوق ومخاطر ماليه ومخاطر اداريه :

مخاطر السوق: (السوق هو من المخاطر الاساسية التي سوف تواجه شركتنا لعدة اسباب, اهمها هي ان الموقع في حد ذاته منصة للترويج حيث سيتطلب الوصول الى هذه المرحلة جد كبير من قبل فريق التسويق وزمن طويل لعمل سمعة جيدة في السوق وبناء علاقة جيدة من الزبون ، اضف الى ذلك نسبة لكثرة المشاريع البرمجية الجديده والافكار المبتكرة اصبح طابع الجمهور صعب لتقبل افكار جديده خصوصا ان شركتنا موقع فريد وذو هيئة مختلفة نوعا ما من باقي المواقع, فمسألة تقبل الجمهور لافكار جديدة موضوع في غاية الاهمية ، وللتغلب على هذه المشكلة ستكون رسالة الموقع معبرة وتوضح جميع الفوائد التي سيتلقاها العميل اضف الى ذلك معظم الخدمات الاساسية المقدمة مجانية وذلك حتى يحظى العميل بتجربة مميزة.).

المخاطر الماليه : (ما يميز المشاريع الرقمية هي انها لا تحتاج الى ميزانيات ضخمة ، ولكن ، هذا لا يعني ان شركتنا لن تواجه مخاطر مالية حيث ان لضمان نجاح المشروع يجب الالتزام بالجودة المطلوبة في البرمجة والتصميم والعناية الخاصة بالتسويق, هذه الامور تتطلب ميزانيات محددة، سنحتاج الى راس مال في بداية المشروع لتغطية تكاليف صناعة الموقع وثم التسويق له وتكاليف التشغيل حتى يعطي المشروع ارباح.)

المخاطر الاداريه: (جميعنا خريجين  جدد وا تحت التخريج وتنقصنا الخبرة الكافية في الادارة خصوصا في الجوانب المالية والتسويقية ، ولكن للتغلب على هذه المخاطر المتابعة الجيدة لخطة العمل واخذ النصائح من المختصين خصوصا من الذين يشجعون الشباب لتطوير مشاريعهم.).

القسم السابع: الخطه الماليه

الخطه الماليه , وزي ما لحظت انها اخر حاجه , ليس لقلة اهميتها, ولكن لو كان ختيناها اول حاجه, عادي جدا الناس ما تنجز شي , بسبب مثلا, كُبر راس المال الذي رأه في البدايه , وعادي جداَ بسبب ذلك ما يتم قراءة الخطه والفكره حقتك, عشان كده بنختها اخر حاجه.

الايرادات

كيف تطلع ايرادات من حاجه وحده بس ؟ حتفهمني في المثال الجاي ده …

قول مثلاَ انا فتحت #جيم , نادي رياضي , كيف ممكن اطلع كاش منو ؟ الايرادات ممكن اطلعه من شنو؟ يلا نشوف..

 ممكن اعمل #حنك عضوية شهريه او سنوية مثلاَ

 ادفع مثلاَ 150 جنيه لو داير تستخدم زياده المسبح والجاكوزي والساونا .

 ادفع اشتراك مدى الحياه بقيمه كده

 اوفر خدمات او انتاجات تكميليه.

 اكلم ناس القنوات الرياضيه اني ممكن اتيح قنواتهم في الجيم بتاعي بمبلغ , كدعايه ليهم

 اتيح الفرصه للماركات الرياضيه زي ناس اديداس للتسويق لمنتجاتهم عندي بمبلغ

ملحوظه: الناس بجوك لمن تشتهر ! عشان كده حاول اشتهر

الوسيط فكره من افكار التجاره

امثله: زي ناس امازون #سمسار بينك انت البائع وبين المشتري.

نرجع لمثال الجيم, ونقول سؤال : كيف ممكن الجيم بتاعي يكون وسيط لحاجه او لناس ويكسب قروش منها ؟

بسيطه جداَ, الادوات القاعدين يستخدموها الناس , تمشي تتفاهم مع الشركه المصنعه وتقول ليهم انا حكون وسيط بينكم وبين الزول الرياضي , والقروش البتجي منو الزول الرياضي , هديكم منها نسبه . كده انتو الطرفين مستفيدين.

وتكون شٍفت كمان لو قدرت تاخد قروش من الطرفين.

الشراكات: الشراكات دي حاجه زي العرس.. الطرفين مفروض يكون عندهم نفس الهدف,بخدمو نفس القطاعات ,

منو البقدر يساعدني  في مشروعي ؟

مثلاَ , ناس بفهمو في التصاميم, السوق, التطوير الخ

مثال لموضوع الشراكات بين شركتين, زي مثلاَ سامسونج واندرويد, مايكروسوفت ونوكيا . الخ

اسأل نفسك السؤال ده… منو البخدم على نفس الشريحه حقتي؟

والشراكه حاجه جميله جداَ لانها ممكن تثمر بمنتج متطور ,, وزي ما قلت قبيل ,ايد مع ايد تجدع بعيد.

التوصيل #الديليفري .. حاجه مهمه جداَ للمبتدئين, #مافي_زوول_بعرفني #ماذا_افعل ؟

عليك بالاتي

 ابني وعي.. اعمل قنوات استخدما لبناء الوعي .. #المواقع_الاجتماعيه استفيد منها, #التسويق_الرقمي

 التقييم… ادي الناس فرصه يقيموك … يجربو المنتج بتاعك او الخدمه البتقدمه ,

مثال: ناس امازون سامحين للناس انهم يعَلقوا ويقولو ارآهم في صفحتهم,, يلا دي حاجه بتخليك تستفيد.

بمناسبة الافتتاح ,, خصم 25% .. مثلاَ

 استخدم #اليوتيوب

 الكلمه الطيبه

 ما توفر منتج فقط.. وفر منتج ومعاه الخدمات حقتو والدعم حقو والصيانه حقتو .. الخ

اهم شي انك تشتغل باخلاص وحب

خليك متواصل مع عملائك بحاجات زي

 نشرات اخباريه ترسله ليهم على الايميل شهرياَ

رسائل تقدير للعميل

 تحديثات جديده للمنتج

واهم حاجه انك ما تزعجو , يعني ما داايماَ ترسل ليهو, كده بزهج منك.

ابني علاقه كويسه بينك وبين العميل , اقعد رسل ليو في الاعياد والمناسبات #خليك_متواصل معاو.

خلي العميل يرتاح, رسل ليو في تلفونو رسايل, حسسو انو زوول مهم ,, حاول اجذبو, خليو يكون فضولي داير يعرف عنك اكتر, ادية الخاصيه بتاعت الاختيار بين حاجيتين او اكتر, اعمل عروض , اًخًد راي الناس, اسأل مختصين ومحترفين, وزي ما بقول المثل ,, اسأل مجرب ولا تسأل طبيب, ,,, ابني فريق قوي

لأنو ده كلو بيعود وبرجع ليك في النهايه

والعميل زاتة هًيقَدر البتعملو انت وهيحبك.. ولو ما حباك يبقى عميل قليل ادب ساي ههههههه.

الماليه: هي فن وعلم اداره المال  .. شفته التعريف ده كيف؟ #الزيت. هههههه

الاداره_الماليه: هي عملية تنشيط البزنس العائد بمال اكثر

مصادر التمويل: مصادر طويلة المدى ومصادر قصيرة المدى.

راس_المال : هو المبلغ اللي انت محتاج ليو عشان تبدا مشروعك.

صفحة_حفظ_التوازن  #بالانس_شييت : دي ورقه بتخد فيها بالاختصار المفيد الـ ليك والـ عليك من مال والارباح وغيره . اهم حاجه في الخطه الماليه , رجاء خاص ان تبحث عنها في الانترنت.

الحاصل في #السودان

الواحد تلقا زيتو طلع وروحو مرقت قريب ال15 سنه قرايا ومعط في الجامعه البتكون طلعت ديشوا . والمصيبه انو لما يتخرج تجي تقابلو بعد كم سنه يا سايق ركشه .. يا شغال ما في تخصصه يا شغال براتب من شده ما ضعيف.. ما بجيب حق #السفه زاتة.. يا تلقاهو هاجر البلد. وعدم انو الشاب السوداني ما يلقى شغل في بلده وخصوصا تخصصه هو السبب الرئيسي لانحراف الشباب ومن خلاله يؤدي ايضا للعنوسه لدى الفتاه السودانيه في بلدنا .. لانو الشاب بيقول ياخ عرس ومهر ومصاريف..الخ الخ… ياخ بلا #عرس بلا كلام فاضي #ادرعت.
والعنوسه هي ايضا السبب الرئيسي لانحراف البت ونزولها الشارع العام . #ادرعت. مما يخلي الباش مهندس سايق الركشه المالاقي حق السفه يقيف ليها و #ادرعت …
المصيبه كمان خصوصا الايامات دي مع زياده الاسعار الطين زاد بله.. وبله يا بله وينو بله دق الرقم جله. . وفعلا جله لانو بله ود عشه سايق ليهو ركشه.. ولما بله يمشي يتقدم لاهل البت حيقولو ليوهو انت سايق ركشه امشي اتخارج #ادرعت
لذلك علينا ان نوفر فرص عمل لاولادنا.. فلذات اكبادنا التي تمشي على الارض.. شباب الغد… وعلى فكره.. عدم اهتمامنا بالشاب السوداني هو الي يؤدي للانحراف.. شراب البنجو والشاش وكريستال البلح عشان ينسوا الهموم التي على كتفهم ويكونو مبسوطين ولو لوهله من الوقت.. #ادرعت
خلونا نكوون واضحيين وصرييحين مع بعض . #السودان حالتو #ادرعت للديش .. الاسعار طقت السما وليس السقف .. يبقى الناس حالها اسه كيف بعد الحنك ده ما حصل.. اكيد ما #الززيت طبعا وعلى قولة ابراهيم الكاشف… وداعا روضتي الغنا وداعا معبدي القدسي.. طويت الماضي في قلبي وعشت على صدى الذكرى.. الخ

عمرابي